काठमाडौँ, जेष्ठ २६ गते ।
नेपालको मन्त्रिपरिषद्मा दुई परिचित अनुहारले पुनः प्रवेश गरेका छन्। गृहमन्त्री सुधन गुरुङ र विज्ञान, प्रविधि तथा नवप्रवर्तनमन्त्री महावीर पुनले मंगलबार राष्ट्रपति कार्यालय शीतल निवासमा पद तथा गोपनीयताको सपथ लिएसँगै दोस्रो पटक मन्त्रीको जिम्मेवारी सम्हालेका हुन् ।

राष्ट्रपति रामचन्द्र पौडेलले आयोजित विशेष समारोहमा दुवै मन्त्रीलाई सपथ गराएका थिए। नयाँ जिम्मेवारीसँगै उनीहरूले आ–आफ्ना मन्त्रालयको नेतृत्व औपचारिक रूपमा सुरु गरेका छन् ।

राष्ट्रिय स्वतन्त्र पार्टीबाट गोरखा–१ प्रतिनिधित्व गर्ने सुधन गुरुङ यसअघि पनि गृहमन्त्री बनेका थिए। चैत १३ गते गृहमन्त्री नियुक्त भएका उनले वैशाख ९ गते पदबाट राजीनामा दिएका थिए। छोटो अन्तरालपछि उनी फेरि सोही मन्त्रालयको नेतृत्वमा फर्किएका छन् ।

त्यस्तै, म्याग्दीबाट स्वतन्त्र उम्मेदवारका रूपमा निर्वाचित महावीर पुन पनि मन्त्री पदमा नयाँ होइनन्। जेनजी आन्दोलनपछि गठन भएको सुशीला कार्की नेतृत्वको सरकारमा उनले शिक्षा, विज्ञान तथा प्रविधिमन्त्रीको जिम्मेवारी सम्हालिसकेका थिए। यसपटक भने विज्ञान, प्रविधि तथा नवप्रवर्तन मन्त्रालयको नेतृत्व गर्दै उनी पुनः सरकारमा सहभागी भएका छन् ।

सार्वजनिक जीवनमा आफ्नो छुट्टै पहिचान बनाएका गुरुङ र पुन दुवैले अब सरकारका महत्वपूर्ण मन्त्रालयको जिम्मेवारी सम्हाल्नेछन्। एकातिर आन्तरिक सुरक्षा र सुशासनको चुनौती छ भने अर्कोतिर विज्ञान, प्रविधि र नवप्रवर्तनमार्फत विकासको गति बढाउने अपेक्षा छ ।

दोस्रो पटक मन्त्री बनेका यी दुई नेताको कार्यसम्पादन र उनीहरूले ल्याउने नीतिगत परिवर्तनप्रति राजनीतिक वृत्तसँगै सर्वसाधारणको पनि चासो बढेको छ ।